御太坊

2008年6月30日

數年前來過一次, 很多人, 這次來也很多人, 訂枱8:30還要等一會。這裏吃越南和泰國菜, 兩樣都是我杯茶, 現在一餐食两樣, 我杯茶變了鴛鴦！

響往已久的麵包咖喱雞。

除咗件衫, 都好有內涵噃, 件衫配咖喱汁好味, 如果咖喱再濃的, 多的薯仔就好喇。

蝦沙爹-好味。

帶子三文魚紙米卷 - 配芥末醬好清好好味。

芽車快- 有海蜇, 椒絲, 金菇....good.

我的至愛 - 泰式炒河, 馳名的Pad Thai. Another good。

兩個小妹妹的飲品, 都選一樣的。(忘了是甚麽喇)

御太坊 - 官塘APM四樓。

紅樓

2008年6月28日

今晚在銅鑼灣有Party, 便在銅鑼灣紅樓晚飯。紅樓這名字源自古典小說《紅樓夢》中對食品精雕細琢的意境、講求飲食品味及宴席派場的精髓, 試過後就覺得是耶非耶!

干燒明蝦 - 把蝦夾到自己碟上時, 已覺不對路, 蝦肉不夠實, 吃落真是一啲都唔新鮮, 我情願佢賣貴的, 比足料, 很失望。(58.00 一隻)

蒲江風鴨 - 鴨肉很像臘鴨, 不過唔鹹而肉嫩, 糯米飯跟松子一起, 是清新的配搭, 我給這個菜80分。 (28.00 一份)

乾隆皇草鞋底 - 這個名分明玩嘢, 改個名等你估佢唔倒係セ嘢。但我最欣賞這個包, 因為新鮮熱辣, 外脆又唔燶, 內面鬆軟, 配明蝦的汁, 好食過明蝦。

青菜煨麵 -好鹹, 何解?? 師傅仔煮的??

食物水準很參差, 勝在地方唔錯, 地點又好, 我們坐的卡位景觀不錯。但這裏厠所很差, 只有一格, 很髒比茶餐廳好少少。佢的主旨是 "講求飲食品味及宴席派場的精髓" 但不講求厠所的衛生。這點我很不滿, 反正我沒預備再來, 所以沒有投訴。

Charcoal 曬太陽

2008年6月23日下午10:50

 

原來騎樓有個位有太陽 (早上10:00), 原來個位好fit Charcoal曬太陽, 原來佢鐘意曬太陽!

元朗大榮華

2008年6月23日

好耐冇寫Blog, 皆因忙到顛, 連外出食好嘢都冇時間, 真要平衡吓,六月快過去, 期待七月。
大榮華很多人都去過, 但我去過多次都未有試過, 實在太多人, 上次六時去到, 排隊的人排到落樓梯, 今次我們五時到達, 才剛有位。
五味雞 - 似豉油雞, 又淡過豉油雞, 又多味過豉油雞, 總的說是好味雞。

用的是冰鮮雞, 如果用鮮雞, 雞肉更嫩, 就冇得彈喇。

頭抽浸日本吊桶- 恰到好處, 很滿這。

支竹炆斑頭腩 - ok 啦。

梅子鹹菜蒸金錢鱔 - 炎夏用梅子鹹菜確醒胃, 但我們覺得肥鱔還是豉汁蒸最頂呱呱。

涼瓜煎魚腸 - 姨長最愛魚腸, 幸好姨長沒有來, 否則失望, 好似過火咗喎。

講番餐前小吃-鹽水雞脚, 有濃香當歸味, 五大隻才賣20.00, 好好味。

頭抽豬油撈飯 - 撈呀撈呀, 精釆的撈飯真係好好味。

男女主角 -頭抽和豬油

要訂的馬拉糕 - 好清好香好味, 食唔哂都打包拿走, 阿B食到唔停。

好鬆好軟

五個人埋單才450.00, 好低食。唔怪得咁多人等位, 我們離開時才6:20分。６點時, 等位的人已廹爆酒樓, 冷氣都唔夠添。
6:00pm

6:20 pm

領滙

2008年6月21日

 

今早在領滙商場的餐廳吃了個早餐。這是我第二次來吃早餐的了。

在領滙上市時, 攪到風風雨雨, 又打官司又要扑老董的老虎頭, 一場一場的政治鬧劇後, 一個一個的領滙商場投入開業。最出名的黃大仙龍翔中心更是自由行遊客點, 裏面的金舖, 藥材鋪不知幾好生意。
我經驗過的領滙商場都生氣勃勃, 經濟轉好, 市民消費上升, 生活質素也提升。我未知領滙政策在現階段可否說是好或不好, 整體評估不是我們小市民去批判, 我只要可以享用, 而且感覺良好就是了。這些商場都做到"與時並進"了。
我的用餐經驗 - 餐廳環境不俗, 有服務, 食物ok, 消費物有所值。 比起去 '大系', '美系', '麥系' 快餐就物超所值添, 因為用較低消費, 而得較高價值(不用張羅買飛, 找位, 取食物)
餐廳裝修環境不錯吧。

紅油抄手, 鹹肉粽, 奶茶 -- 17.00

炒蛋, 蘿白糕, 腸仔, 雞扒, 茄汁豆, 奶茶 -- 18.00

橄欖菜

2008年6月17日

廣州的朋友送了我一樽橄欖菜, 這是廣州欖菜馳名牌子。在國內酒店的早餐, 很多都有欖菜送粥, 送白粥更突顯欖菜的獨特馥旭的甘香。

昨天試用欖菜, 蒜蓉炒青豆, 嘩! 好好味, 蒜蓉配欖菜出奇的匹配, 青豆的角色在它的爽脆口感, 味道集中在蒜蓉欖菜。這個菜可以招呼朋友,有信心人吃人愛。
造法也很簡單：青豆切段出水備用, 起鑊爆香蒜蓉, 下青豆稍兜炒, 洒少許鹽, (喜歡淡口的不用下鹽, 因為欖菜也有鹹味), 再落欖菜, 兜勻上碟。 真正快靚正。

今天再接再厲, 再來欖菜煮節瓜, 加些洋葱, 鮮冬菇, 也好味喎。